 |
| प्रेम ओली |
खसिको मासु पाईन्छ भन्ने ठाउमा
बुढी बाख्री काटिन्छ
भागवानको घरमा नयाँ जुता
पुरानो जुता सँग साटिन्छ
हरेक दिन
नयाँ कुराको हल्ला छ
तपाईंलाई के थाहा
मेरो शहर कति झल्ला छ ।
यहाँ
काम नगर्नेहरु बाट नै
भाषन ठुलो ठुलो छाटिन्छ
हुट्टी ट्याउले आकाश आटे झै
आश्वासन ठुला ठुला बाटिन्छ
भुसिया कुकुरबाट
जनताको दिमाग चाटिन्छ
आज एउटा कुरोको सल्लाह छ
भोली अर्कै कुरोको हल्ला छ
तपाईंलाई के थाहा
मेरो शहर कति झल्ला छ ।
यो शहरको भित्र एउटा
बाहिर अर्कै खोल छ
मान्छे पिच्छे यहाँ
मान्छे मान्छे बिच मोल छ
निमुखाहरु बिचरा न हुन
बलिया बाङगाको बोल छ
बाहिर तडक र भटक धेरै
भित्र सबैको डामाडोल छ
आजको भाले त्यो
भोली त त्यो अर्कै चल्ला छ
तपाईंलाई के थाहा
मेरो शहर कति झल्ला छ ।
यहाँ
घरै पिच्छे
तुम्बा र ठर्राको भट्टी छ
भट्टी भित्र
मन बहलाउने अधबैसे पट्ठी छ
नगद नारायणलाई स्वागत
उधारो माग्नेलाई कट्टी छ
बाहिर छेक्ने पर्दा भए पनि
भित्र सबै खुलम खुल्ला छ
तपाईंलाई के थाहा
मेरो शहर कति झल्ला छ ।
ठग्नेहरु पनि यही
ठगिनेहरु पनि यही
जती शुद्दता कुरा गरे पनि
खाधान्यमा माटोको डल्ला छ
हिजो पनि
आज पनि
सरकारको सधैं यहाँ
करबाही गर्छु भन्ने हल्ला छ
तपाईंलाई के थाहा
मेरो शहर कति झल्ला छ ।
यहाँ
हरेकको आफ्नै दाउ छ
सोझा साझालाई घुमाउ छ
टाठा बाठाको ठुलै भाउ छ
सिधा सादाको गुमाउ छ
लुच्चा लफङ्गाको कमाउ छ
मै हुँ भन्नेको पनि यहा बाउ छ
हिजो केही नहुनेहरु आज
गगन चुम्बी महलको साहु छ
देखाउने एउटा
बेच्ने अर्कै गल्ला छ
तपाईंलाई के थाहा
मेरो शहर कति झल्ला छ ।
No comments:
Post a Comment
तपाँइको अमुल्य सुझाव , सल्लाह र प्रतिक्रिया दिन नभुल्नुस् है । Plz drop ur Valuable Comment Here ..