आगोको यात्रा ......... कविता

टीकाराम उदासी

हरेक विहान
अचेल मेरा कोठामा

एक हुल आगोहरु आउँछन्

र भन्छन्

निस्कौं अब आगोको यात्रामा

हरेक साँझ अचेल मेरो संघारमा

एक हुल आँखाहरु आउँछन्

र भन्छन्

हिडौं अब चेतनाको यात्रामा

अनि सधै–सधै

मेरो मनको चौतारीमा

सस्ताउँछन् एक हुल मनहरु

र भन्छन्

चढौं आस्थाको एउटा शिखर

चढौं विश्वासको एउटा सगरमाथा

हिड्नेहरु

छेपारो जुलुसमापनि हिडिरहेछन्

र नाचिरहेछन्

नाच्नेहरु ताण्डव तृत्य

सम्भावित आफ्नै मृत्युको भयावह संगीतमा

अनि म उभिएर समयको यस चोकमा

कविता लेखिरहेछु –आगोको सुन्दर कविता

गीत गाइरहेछु –आगोको मिठो गीत

र ठीक यतिखेर

तन भरी÷मन भरी

बोकेर आगोको सिंगै समुद्र

हिडिरहेछन् अनेकौं यात्रीहरु आगोको यात्रामा

निस्किरहेछन् अनेकौं मनहरु आगोको यात्रामा